Dom lavic

I doms lavics a son culinutis di forme par solit taronde, cun parêts ertis, formadis cuant che un magme une vore viscôs, sicu dacite o riolite, al ven erutât. Chescj magmis a son cetant viscôs di no rivâ a dislontanâsi de bocje erutive prime di disfredâsi e cristalizâsi. Le formazion di doms e je dispes corelâde a une eruzion une vore esplosive.

Fats e dâts: Fûr dai 1511 vulcans che si cognossin eruzions di lôr tai ultins 10'000 agns, dome 40 a son clasificâts tant che doms lavics indipendents, ven a stâi cence metiju dongje a un altri vulcan. I doms lavics a son di fat par solit erutâts tal cuc o tai versants di stratovulcans.

Ancje se la costruzion di un dom e je fate intun mût lent e no esplosîf, i doms, come che a son struturis instabils, a puedin produsi mortâi flus piroclastics. Eruzions resintis dai doms lavics dal Unzen in Gjapon, e dal Soufriere Hills te isule di Montserrat a an obleât a la evacuazion di miârs di personis.

Cualchi dom al è componût ancje di osidiane, un veri vulcanic che a si pues formâ tacant cun magmis di tip riolitic o dacitic. Une part bocone de osidiane e je di colôr neri però a si cognossin ancje esemplis di osidiane rosse, verde e maron. La osidiane e si forme cuant che il magme si sfrede cuntune velocitât cussì alte che al no lasse la cristalizazion dai sengui minerâi.

Dom dentri dal cratêr dal Mt. St. Helens, Washington, USA. Foto: J. Alean